Schlanders (Südtirol / Vinschgau)

31 Aug 2019

Bemerkung des Leiterteams: Die 90-jährige Ruth Tschannen hat auch dieses Jahr in Verdankens werter Weise die Ferienwoche in Versform wieder gegeben. Toll ist das; Herzlichen Dank an Ruth!

 

Eh du min Troscht, eh du mini Güeti,

Was isch oh los mit dr Monika, üsem Seniore-Ferie Müeti?

Äs zwirblet hie ume u det ume u anderswo,

Zletscht landets in Schlanders im Südtirol.

Da isch es schön, da fahre mer häre,

Sicher wird’s de Seniore gfaue, da gits nüt z chäre!

 

Itz wird organisiert mit der Edith u der Ruth,

Mit dene zwo Froue chunnts scho guet.

Si studiere u plane u chöme drus ,

U de schicke si üs e Flyer its Hus.

 

Am 24. Ougschte söue mer mit packte Goffere parat stah,

Äs sig drum eso, am Zähni möcht der Chauffeur mit üs Oetwil verlah.

E schöni Fahrt, e mou, äs isch der Hammer,

Villicht es Bitzli lang, aber äs git kes Gjammer.

 

Fahre tüe mer über e Flüelapass nach Ardez,

Nach em guete z’Mittagässe, het sech der Car wieder i Bewegig gsetzt.

Gnosse hei mer di schöni Landschaft,

Ou über e Reschepass fahre het is Fröid gmacht.

 

Glücklech, zfride, müed u beziite,

Chöme mer aa im Hotel zu de Vier-Jahres-Ziite.

Hei, di schöne Zimmer, ds guete Ässe u de no das prächtige Bad,

Ganz sicher gniesse mer das jetz jede Tag.

 

Scho faht e nöie Ferietag aa,

Am Morge si mer ga spaziere u heis luschtig gha.

Am Namittag isch e Frou Mulser vo früechere Ziite cho verzeue,

Vo dr Obrigkeit, vo de Pfärrer u süsch no vo komische Gseue.

 

Am nächschte Tag geit’s wiiter, Himmel no mal,

Nach Pufels im schöne Grödnertal!

D Aalag vom Rosarium isch wunderschön gläge,

Aber leider si di Rose rächt lädiert vom viele Räge.

 

Tags druf git der Schoffeur Gas

U fahrt üs zum schöne Obschthof nach Laas.

Vo süesse u suure Öpfu hei mer nid vil verno,

Derfür hei mer Schnaps u Likör übercho.

 

D Fahrt is Martelltal füehrt üs its Museum u a Zufrittsee,

Es isch e prächtige Usflug, was weimer eigetlech no meh?

 

Itz hät i no fasch öpis usse gla, mer si doch no ine Sattlerei.

Steuet nech vor, Läderruckseck hei mer kouft u di nämer mit hei.

 

Am Friitig, am letschte Ferietag, hei mer gjasset u si ga Beizli bsueche,

Mit sone re guete , fröhleche Gruppe, tüe mer sicher wiiterhin bueche!

 

U scho si di Senioreferie verbii

Sogar d’Heifahrt isch es Erläbnis gsii!

Es ganz härzlechs Dankeschön üsne Leiterinne,

Mir fröie üs scho, di nächschte Ferie mi ihne z’verbringe.

 

R. Tschannen

 

 

 

 

 

 

 

 

Please reload